ઉત્તર-પૂર્વીય રાજ્યોમાં વરસાદથી હજારો ગામો જળબંબાકાર, મણિપુરમાં પૂરે તબાહી મચાવી

ઈમ્ફાલ, તા.૨
મણિપુરમાં ભારે વરસાદને કારણે છેલ્લા ૪૮ કલાકમાં પૂર અને ભૂસ્ખલનને કારણે ૩,૮૦૨ લોકો પ્રભાવિત થયા છે અને ૮૮૩ ઘરો તબાહ થઈ ગયા છે. અધિકારીઓએ જણાવ્યું હતું કે, નદીઓમાં પાણી ભરાઈ જવાથી અને બંધ તૂટવાથી રાજ્યની રાજધાની ઈમ્ફાલ અને ઈમ્ફાલ પૂર્વ જિલ્લાના ઘણા વિસ્તારો પાણીમાં ગરકાવ થઈ ગયા હતા. તેમણે માહિતી આપી હતી કે, મણિપુરના રાજ્યપાલ અજય કુમાર ભલ્લાએ ઈમ્ફાલ શહેરના અનેક ડૂબી ગયેલા વિસ્તારોની મુલાકાત લીધી હતી, જ્યારે સેના અને આસામ રાઈફલ્સના જવાનોએ સૌથી વધુ અસરગ્રસ્ત જિલ્લા ઈમ્ફાલ પૂર્વમાં ડૂબી ગયેલા વિસ્તારોમાંથી લગભગ ૮૦૦ લોકોને બચાવ્યા હતા. આ ઉપરાંત, ભારતના ઉત્તરપૂર્વીય રાજ્યોમાં વિવિધ ઘટનાઓમાં ૩૦ થી વધુ લોકોના મોત થયા છે.
આઇએમડી ઇમ્ફાલ સ્થિત હવામાન કેન્દ્ર અનુસાર, ગુરુવારે રાજ્યમાં સૌથી વધુ વરસાદ સરહદી વિસ્તારમાં મોરેહમાં નોંધાયો હતો, જ્યાં ૧૦૨ મીમી વરસાદ પડ્યો હતો. ત્યારબાદ અનુક્રમે કામજાેંગ (૯૬ મીમી), ચંદેલ (૭૬ મીમી) અને ઉખરુલ (૬૦.૮ મીમી) વરસાદ પડ્યો હતો. હવામાન વિભાગે કહ્યું છે કે, હાલમાં ૫ જૂન સુધી આ વરસાદથી રાહત મળવાની કોઈ શક્યતા નથી. આઇએમડી મુજબ, આગામી થોડા કલાકોમાં ઉત્તરપૂર્વીય ક્ષેત્રમાં ભારે વરસાદ પડી શકે છે. આઇએમડીએ ૪ જૂન સુધી આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં વિવિધ સ્થળોએ ભારે વરસાદની આગાહી પણ કરી છે. તે જ સમયે, અરુણાચલ, આસામ અને મેઘાલયમાં પણ ભારે વરસાદની આગાહી છે. રાજભવન દ્વારા જાહેર કરાયેલા એક નિવેદનમાં કહેવામાં આવ્યું છે કે, ભલ્લાએ મુખ્ય સચિવ પીકે સિંહ અને અન્ય વરિષ્ઠ અધિકારીઓ સાથે ઇમ્ફાલમાં કાંગલા નોંગપોક થોંગ, લૈરીકિએંગબામ લીકાઇ અને સિંગજામેઇ બ્રિજની મુલાકાત લીધી હતી અને ત્યાંની પરિસ્થિતિનું મૂલ્યાંકન કર્યું હતું. રાજ્યમાં પૂર અને ભૂસ્ખલનના પરિણામે છેલ્લા ૪૮ કલાકમાં ઓછામાં ઓછા ૩,૮૦૨ લોકો પ્રભાવિત થયા છે અને ૮૮૩ ઘરોને નુકસાન થયું છે. રવિવારે વરસાદે આસામના આ વિસ્તારોમાં વિનાશ વેર્યો હતો. પાણીની ઉછળતી લહેરો બધે ફેલાઈ ગઈ હતી. ચોમાસાના આગમન સાથે, ભારે વરસાદે સમગ્ર વિસ્તારને સમુદ્રમાં ફેરવી દીધો હતો. દરેક જગ્યાએ પાણી હતું. ઘરો ડૂબી ગયા હતા. ખેતરોમાં પાક નાશ પામ્યો હતો. પ્રાણીઓના જીવ જાેખમમાં મુકાયા હતા. માણસો પોતાનો જીવ બચાવવા માટે કુદરતના જાદુ સાથે ઝઝૂમતા જાેવા મળ્યા હતા. ગામલોકો નાની હોડીઓ અને વાંસની મદદથી પોતાનો જીવ બચાવવાનો પ્રયાસ કરતા રહ્યા હતા.