પીએમ મોદી ગોટાળા કરીને ચૂંટણીઓ જીતે છે

બેંગલુરુ, તા.૧
ઇવીએમની વિશ્વસનીયતા પર ફરી એકવાર સવાલ ઉઠાવીને કોંગ્રેસ અધ્યક્ષ મલ્લિકાર્જૂન ખડગેએ આક્ષેપ કર્યાે હતો કે વડાપ્રધાન નરેન્દ્ર મોદી ગોટાળા કરીને ચૂંટણીઓમાં વિજયી બને છે. ખડગેએ પોતાના દાવાના સમર્થન માટે અમેરિકન બિઝનેસમેન ઇલોન મસ્કના નિવેદનને પણ ટાંક્યું હતું. બેંગલુરુમાં કોંગ્રેસ ભવન ખાતે ખડગેએ જણાવ્યું હતું કે મોદી ચૂંટણીમાં જીતતા નથી. બધું છેતરપિંડી છે. તેઓ મતદાર યાદીમાંથી ૧૦,૦૦૦ નામો દૂર કરાવે છે અથવા ૧૦,૦૦૦થી ૨૦,૦૦૦ નવા નામનો ઉમેરો કરાવે છે, પરંતુ સવાલ એ છે કે તેની કેવી રીતે સાબિત કરવું.
તેઓ ભૂતપૂર્વ વડાપ્રધાન સ્વર્ગસ્થ ઈન્દિરા ગાંધી તથા ભારતના પ્રથમ નાયબ વડાપ્રધાન સરદાર વલ્લભભાઈ પટેલને શ્રદ્ધાંજલિ આપવા માટેના એક કાર્યક્રમમાં બોલી રહ્યાં હતાં. ખડગેએ જણાવ્યું હતું કે મસ્ક ટેક એક્સપર્ટ છે. તેમણે કહ્યું છે કે કોમ્પ્યૂટર દ્વારા ઈફસ્માં ચેડાં કરી શકાય છે અને તેને હેક કરી શકાય છે. યુએસ, કેનેડા, બ્રિટન, જર્મની, ફ્રાન્સ અથવા ઇટાલી જેવા કોઈ મોટા પશ્ચિમી રાષ્ટ્ર ઈવીએમનો ઉપયોગ કરતા નથી.