દુબઈ ભાગેલા ઠગોને ભારત લાવવામાં આવશે ખરા? ચાઇનીઝ ઠગબાજાેનું હાઇટેક કોમ્પ્યુટર૨૦૦ બેંક એકાઉન્ટ એક સાથે લોગ-ઇન! સુરત અને દુબઈથી બેંકમાં ટ્રાન્ઝેક્શન કરતા હતા

સુરત,તા.૧૬
દેશભરમાં ૧૧૧ કરોડ રૂપિયાના સાયબર ફ્રોડની ઘટનામાં ચાઇનીઝ ગેંગનો હાથ હોવાનું સામે આવ્યું છે. આ ચાઇનીઝ ગેંગ દુબઈ બેઠાં બેઠાં સુરતના યુવકોને એજન્ટ તરીકે રાખી સાયબર ફ્રોડ કરાવતી હતી. આ ઘટસ્ફોટ ૪ આરોપી દ્વારા કરવામાં આવ્યો છે. ત્યારે આ સાયબર ફ્રોડની ઘટનામાં વધુ એક ચોંકાવનારો ઘટસ્ફોટ થયો છે. સુરતમાં ઝડપાયેલા આરોપીઓ જે ઓફિસમાં બેસીને મલ્ટીપલ બેંક એકાઉન્ટમાં ટ્રાન્ઝેક્શનના કરતા હતા એના એક જ કોમ્પ્યુટરમાં ૨૦૦થી વધુ એકાઉન્ટ ઓનલાઈન લોગ-ઇન હતાં. માત્ર ૩૦ મિનિટમાં જ સાયબર ફ્રોડના પીડિત દ્વારા જે પણ લાખો રૂપિયા મોકલવામાં આવતા હતા એને ગણતરીની મિનિટોમાં આરોપીઓ મલ્ટીપલ એકાઉન્ટમાં ટ્રાન્સફર કરી દેતા હતા.
૧૧૧ કરોડ રૂપિયાના સાયબર ફ્રોડમાં હાલ આરોપી હિરેન સાયબર સેલની કસ્ટડીમાં છે. તેણે સાયબર સેલને જણાવ્યું હતું કે તે સિવિલમાં એન્જિનિયરિંગની ડિગ્રી ધરાવે છે. દુબઈ નોકરી કરવા માટે ગયો હતો અને ત્યાં તેની ઓળખાણ આ ચાઇનીઝ ગેંગ માટે કામ કરતા લોકો સાથે થઈ હતી અને ત્યારથી જ તે આ ગેંગ માટે એજન્ટ તરીકે કામ કરવા લાગ્યો હતો. સુરત ખાતે લોજિસ્ટિક ક્ષેત્રમાં કામગીરી કરવા માટે ઓફિસ ખોલીને આરોપીઓ એક જ કોમ્પ્યુટર થકી કરોડો રૂપિયાના ટ્રાન્ઝેક્શન કરતા હતા. આ કરોડો રૂપિયા તેઓ દેશભરના અનેક લોકોને સાયબર ફ્રોડની ઘટનામાં શિકાર બનાવીને બેંક એકાઉન્ટમાં મગાવતા હતા અને ત્યાર બાદ અલગ અલગ વ્યક્તિઓના નામે ખોલાવવામાં આવેલાં એકાઉન્ટમાં મલ્ટીપલ ટ્રાન્ઝેક્શન કરતા હતા.
સુરત અને દુબઈમાં બેસીને આરોપીઓ એક બેંક એકાઉન્ટથી અનેક બેંક એકાઉન્ટમાં ટ્રાન્સફર કરતા હતા. સુરતમાં અજય ઇટાલિયા આ કામકાજ સાંભળતો હતો, જ્યારે દુબઈમાં હિરેન આ ટ્રાન્ઝેક્શનનું કામ સંભાળતો હતો. સાયબર ફ્રોડ સાથે સંકળાયેલી ટોળકી ગરીબ, લાચાર અને શ્રમિક લોકોને પાંચથી દસ હજાર રૂપિયા આપીને તેમના નામે બેંક એકાઉન્ટ ખોલતી હતી અને આ એકાઉન્ટમાં તેઓ દેશભરથી આવેલા ફ્રોડના પૈસાના ટ્રાન્ઝેક્શન કરતા હતા અને તેને ક્રિપ્ટો કરન્સીમાં કન્વર્ટ કરી ચાઈનીઝ ગેંગને આપતા હતા.
લોજિસ્ટિક ફર્મના નામે ઓફિસ ખોલીને આરોપીઓ બેસતા હતા, ત્યાં ઓફિસમાં ફક્ત એક જ કોમ્પ્યુટર હતું. જ્યારે પોલીસે ત્યાં રેડ કરી આ કોમ્પ્યુટર જપ્ત કર્યું ત્યારે પોલીસ આ કોમ્પ્યુટર જાેઈ ચોંકી ગઈ હતી, કારણ કે એક જ કોમ્પ્યુટરમાં અલગ અલગ ઓનલાઇન બેંક એકાઉન્ટનાં ૨૦૦ જેટલાં એકાઉન્ટ લોગ-ઇન હતાં અને એ સમયે આરોપીઓ ઓનલાઈન ટ્રાન્ઝેક્શન કરી રહ્યા હતા. ગૂગલમાં આોરપીઓ ઓનલાઈન બેંક એકાઉન્ટના યુઝરનેમ અને પાસવર્ડ સેવ કરીને રાખતા હતા અને જ્યારે પણ આરોપીઓને ખબર પડે કે કોઈ પીડિત એકાઉન્ટમાં પૈસા મોકલે છે, એ પૈસા તાત્કાલિક આરોપીઓ અલગ અલગ બેંક એકાઉન્ટમાં ટ્રાન્સફર કરી દેતા હતા, જેને માત્ર ૩૦ મિનિટ જેટલો સમય લાગતો હતો.
જે બેંકમાં વિદેશથી ટ્રાન્ઝેક્શન સહેલાઈથી થઈ જાય એ બેંકમાં તેઓ સૌથી વધારે એકાઉન્ટ ખોલાવતા હતા. પોલીસ તપાસમાં ૬ બેંકની ડિટેલ મળી આવી છે, જેમાં કેનેરા બેંક, પંજાબ નેશનલ બેંક, ઇન્ડિયન બેંક, જમ્મુ એન્ડ કાશ્મીર બેંક, યુકો બેંક અને ઇન્ડિયન ઓવરસીઝ બેંકનો સમાવેશ થાય છે. આ બેંક એકાઉન્ટ અંગે જ્યારે પોલીસે આરોપીઓની પૂછપરછ કરી ત્યારે તેમણે જણાવ્યું હતું કે બેંક કિટમાં વિઝાકાર્ડ આપે છે, જેના કારણે વિદેશથી પણ સહેલાઈથી ટ્રાન્ઝેક્શન થઈ શકે છે.