(સિટી ટુડે) વડોદરા :
વડોદરામાં નશામાં ધુત કારચાલકે અકસ્માત સર્જી એક માસૂમ બાળકનો જીવ ગુમાવ્યો . અવધૂત ફાટક પાસે મોડીરાત્રે એક નબીરાએ બેફામ રીતે કાર હંકારી ફૂટપાથ પર સૂતેલા શ્રમજીવી પરિવાર ઉપર ચડાવી દીધી હતી. આ અકસ્માતમાં 4 વર્ષના એક માસૂમ બાળક પર કારનાં પૈડાં ફરી વળતાં તેનું ઘટનાસ્થળે જ કરુણ મોત નીપજ્યું હતું, જ્યારે અન્ય 4 શ્રમજીવીને ઈજા અકસ્માત સર્જીને ભાગતાં કારચાલકનો લોકોએ પીછો કરીને ઝડપી બરાબરનો મેથીપાક ચખાડ્યો પોલીસે સ્થળ પર પહોંચી કારમાંથી વિદેશી દારૂની બોટલો કબજે કરી આરોપી સામે કાયદેસરની કાર્યવાહી હાથ ધરી છે.
‘આરોપી દારૂના નશામાં અકસ્માત સર્જી ભાગ્યો હતો :ડીસીપી જગદીશ ચાવડા : ડીસીપી જગદીશ ચાવડાએ જણાવ્યું હતું કે અહીંથી રાવપુરા પોલીસ સ્ટેશનની હદમાં આ ગાડીનો ચાલક અકસ્માત કરીને અહીં અક્ષર ચોક સુધી ભાગીને આવી ગયો હતો અને પબ્લિકનાં ટોળાં એકત્રિત થઈ ગયાં હતાં. દરમિયાન પોલીસ આવીને આરોપીને લઈ ગઈ છે. અમારા અધિકારી બનાવ બન્યો એ સ્થળે તપાસ કરી રહ્યા છે. ગાડી ચેક કરતાં એક દારૂની બોટલ મળી છે, સાથે બીજા અન્ય તેમની જે કોઈ જીવન જરૂરિયાતની ચીજવસ્તુઓ છે એ અસ્તવ્યસ્ત છે એ એક વખત ગાડીમાં વધારે ચેક કરીને જ જણાવીશું. આ ઘટના ખૂબ જ ગંભીર ગણી શકાય અને પોલીસ એમાં એકદમ સ્ટ્રિક એક્શન સાથે કાયદેસરની કાર્યવાહી કરશે.કારચાલકે જે પોલીસ સ્ટેશન વિસ્તારમાં અકસ્માત કરીને આવ્યો છે એ વિસ્તાર રાવપુરા પોલીસ સ્ટેશન લાગે છે, જેથી આરોપીને ત્યાં લઈ જઈ આગળની કાર્યવાહી કરવામાં આવશે.
