બીજા ધોરણમાં અભ્યાસ કરતી ૭ વર્ષની બાળાને શાળા પાછળ લઈ જઈ અજાણ્યા યુવકે હાથ પર ઈન્જેક્શન પણ આપ્યા હોવાનો આરોપ

(સિટી ટુડે) અમદાવાદ,તા.૨૪
વિજાપુરમાં આનંદપુરા ચોકડી રોડ પર આવેલી એક શાળામાં ધોરણ બે માં અભ્યાસ કરતી એક ૭ વર્ષિય બાળકી સાથે આઇટીઆઇ માં ભણતા અજાણ્યા યુવકે શારીરિક અડપલાં અને હાથમાં ઈન્જેકશન આપવાની અત્યંત શરમજનક ગંભીર ઘટના સામે આવી છે. આ ઘટના અંગે નોંધાવવામાં આવેલી ફરિયાદના આધારે પોલીસ આરોપીની તાત્કાલિક ધરપકડ કરીને કાનૂની કાર્યવાહી કરી પીડિત દીકરી ને ન્યાય અપાવવા પૂર્વ ધારાસભ્ય ગ્યાસુદ્દીન શેખ અને ધારાસભ્ય ઇમરાન ખેડાવાલાની માંગ છે.

વિજાપુર શહેરમાં આવેલી એક શાળામાં ધોરણ બે માં અભ્યાસ કરતી ૭ વર્ષની બાળકીએ બે દિવસ પહેલાં શાળામાંથી છૂટીને ઘરે જઈ પોતાના માતાપિતાને પોતાની સાથે ઘટીત ઘટના અંગે જાણ કરતાં તેઓ ચોંકી ઉઠ્‌યા હતા. બાળકીએ શાળામાં અજાણ્યો યુવક તેણીનો હાથ પકડીને શાળા પાછળના બગીચા તરફ તા.૧૯ અને ૨૦ નવેમ્બરના રોજ લઈ ગયો હતો. જયાં તેની કોણીના ભાગે કોઈ ઈન્જેક્શન આપીને તેની સાથે અડપલાં કર્યા હોવાનું જણાવ્યું હતું.ત્યારબાદ કોઈને કહેશે તો મારી નાખવાની ધમકી આપી હતી. જેથી ભોગ બનનાર બાળકીના માતા-પિતા આ શાળામાં જઈને શિક્ષિકાને રૂબરૂ મળીને જાણ કરાઇ હતી.