આરોપી પાપ ધોવા મહાકુંભ પહોંચ્યો, પોલીસે ઝડપી પાડ્યો

સુરત,તા.૨૧
હાલ મહાકુંભમાં લોકો પોતાના પાપ ધોવા માટે જઈ રહ્યા છે. ત્યારે સુરતમાં ૩૧ વર્ષ પહેલા ચોરીના ગુનામાં પોલીસથી નાસતો ફરતો આરોપી પણ મહાકુંભમાં પોતાના પાપ ધોવા માટે ગયો હતો.
આ માહિતી મળતાની સાથે સુરતની રાંદેર પોલીસ આરોપીને શોધી કાઢી તેને કરેલા પાપની સજા આપવા માટે મહાકુંભના મેળામાં ગઈ હતી. જાેકે, આ આરોપી મહાકુંભ બાદ તે દિલ્હી ભાગી ગયો હતો. સુરત પોલીસે આરોપીને દિલ્હી ખાતેથી ઝડપી પાડીને તેના વિરુદ્ધ કાયદેસરની કાર્યવાહી હાથ ધરી છે.
આજથી ૩૧ વર્ષ પહેલા એટલે કે, ૧૯૯૫માં રાંદેર સ્થિત મહાવીર પેટ્રોલ પંપમાંથી રૂ.૫૧,૦૦૦ની ચોરી કરીને નાસી ગયેલો શિવ બહાદુર ઉદયપાલ રાજપૂત ૩૧ વર્ષથી પોલીસથી છુપાતો ફરતો હતો. આખરે, રાંદેર પોલીસને ચોક્કસ બાતમી મળી કે, આરોપી કુંભ મેળામાં પાપ ધોવા ડૂબકી લગાવવા ગયો છે. પોલીસે તરત જ મજબૂત ગેમ પ્લાન બનાવ્યો હતો. પરંતુ આરોપી તેમનાથી એક સ્ટેપ આગળ નીકળી ગયો. આરોપી શિવ બહાદુર ઉદયપાલ રાજપૂત ત્રણ દશકથી પોલીસથી છુપાઈને ફરી રહ્યો હતો. પરંતુ રાંદેર પોલીસને મળેલી એક ચોક્કસ બાતમી અને તેમના સ્માર્ટ પ્લાનિંગના કારણે આખરે આરોપીને પકડી પાડવામાં આવ્યો છે. આરોપી વર્ષોથી ફરાર હતો અને ક્યારેય પકડાયો ન હતો, પરંતુ રાંદેર પોલીસ તેના લટકતા કેસને ઉકેલવા સતત પ્રયત્નશીલ હતી. કેસના તમામ જૂના રેકોર્ડ્‌સ તપાસ્યા અને ટેકનિકલ સર્વેલન્સ દ્વારા તપાસ આગળ ધપાવવામાં આવી. આ દરમિયાન પોલીસને બાતમી મળી કે, કુંભમેળામાં (પ્રયાગરાજ) શિવ બહાદુર હાજર છે. તે કુંભ મેળામાં નહાવા માટે ગયો હતો. પોલીસની ટીમે ગુપ્ત રીતે કુંભ મેળામાં જઈ તપાસ શરૂ કરી. પરંતુ આરોપી ત્યાંથી નીકળી ગયો હતો. આરોપી કુંભમાંથી દિલ્હી જતો હોવાની માહિતી મળી. પોલીસ તરત જ તેની પાછળ લાગી. આરોપી કુંભ મેળામાં હોવાની બાતમી રાંદેરના હેડ કોન્સ્ટેબલ કિરીટ સિંહને મળી હતી. બાતમી મળતા તરત જ પોલીસે તપાસ શરૂ કરી હતી પરંતુ એ ખબર પડી કે તે કુંભથી દિલ્હીના અગ્રવાલ ભવન ખાતે ગયો છે.
ટેકનિકલ સર્વેલન્સ અને ગુપ્ત તપાસ દ્વારા આરોપીના હાલના ફોટા અને મોબાઈલ નંબર મળ્યો. પોલીસે સિક્યુરિટી કંપની બનીને આરોપીને વધારે પગારની લાલચ આપી. જ્યારે આરોપી નોકરી માટે મળવા આવ્યો, ત્યારે એકદમ ટ્રેપ ગોઠવી પકડી પાડવામાં આવ્યો. પકડાયેલા આરોપીની પૂછપરછ કરતા આરોપી છેલ્લા ૩૧ વર્ષથી અલગ અલગ શહેરોમાં નામ અને ઓળખ બદલીને જીવતો હતો. જાેકે આરોપી ક્યાં હતો? શું અન્ય ગુનાઓમાં પણ સંડોવાયેલો છે તે મુદ્દે વધુ તપાસ ચાલી રહી છે.