અજમેરમાં ભારે વરસાદ, ઘરોમાં પાણી ભરાયા, લોકો તણાયા, ૬ જિલ્લામાં શાળાઓ બંધ

નવી દિલ્હી, તા.૧૯
બંગાળની ખાડીમાં ડિપ્રેશન સિસ્ટમ સક્રિય હોવાથી, રાજસ્થાનના ૬ જિલ્લાઓ- જોધપુર, નાગૌર, પાલી, અજમેર, સિરોહી, જાલોરમાં ભારે વરસાદ પડી રહ્યો છે. શનિવારે અજમેર અને ટોંકમાં પૂર જેવી સ્થિતિ છે. ઘણા વિસ્તારો પાણીમાં ડૂબી ગયા છે. શનિવારે કોટા, બારન, ઝાલાવાડ, અજમેર, બુંદી, રાજસમંદ અને નાગૌરની શાળાઓમાં રજા જાહેર કરવામાં આવી છે. શુક્રવારે રાત્રે અજમેરના દરગાહ બજાર વિસ્તારમાં ભારે વરસાદને કારણે ઘણા લોકો પાણીમાં તણાઈ ગયા હતા. રાજસ્થાનમાં આ ચોમાસાની ઋતુમાં અત્યાર સુધી સરેરાશ કરતાં ૧૦૯ ટકા વધુ વરસાદ પડ્યો છે. રાજસમંદમાં બંધ તૂટવાથી ૩ સ્કૂલના બાળકો સહિત ૭ લોકો પાણીના પ્રવાહમાં ફસાઈ ગયા. જોધપુરના અર્ના-ધોધ વિસ્તારમાં ડૂબી જવાથી એક યુવાનનું મોત થયું. સીકરમાં ૧૩ વર્ષના બાળકનું ડૂબી જવાથી મોત થયું. રાજસ્થાનમાં છેલ્લા ચાર દિવસમાં વરસાદ સંબંધિત અકસ્માતોમાં ૨૩ લોકોએ જીવ ગુમાવ્યા છે.