ભાજપના ૧૦૦ ઉમેદવાર તો બિનહરીફ જ જીતી ગયા! મહારાષ્ટ્ર યોજાનાર સ્થાનિક એકમની ચૂંટણી

મુંબઈ, તા.૨૨
મહારાષ્ટ્રની નગર પરિષદ અને નગર પંચાયતની ચૂંટણીઓમાં ભારતીય જનતા પાર્ટીએ જબરદસ્ત સરસાઈ મેળવવાનો દાવો કર્યો છે. ઉમેદવારી પાછી ખેંચવાની અંતિમ તારીખે, પાર્ટીના ૧૦૦ નગરસેવકો અને ૩ ચેરમેન નિર્વિરોધ ચૂંટાયા. આનો અર્થ એ છે કે ચૂંટણી મુકાબલો શરૂ થાય તે પહેલા જ ભાજપે એક મોટો સ્કોર બનાવી દીધો છે. ભાજપના પ્રદેશ અધ્યક્ષ રવીન્દ્ર ચવ્હાણે આ જીતની માહિતી આપી હતી.
ભાજપના પ્રદેશ અધ્યક્ષ રવીન્દ્ર ચવ્હાણના મતે પીએમ મોદી અને મુખ્યમંત્રી દેવેન્દ્ર ફડણવીસના નેતૃત્વ પર જનતાએ વિશ્વાસ મૂક્યો છે. પાર્ટીના નેતાઓ દાવો કરે છે કે ભાજપની નીતિઓ અને વિકાસના વચનોએ એટલો પ્રભાવ પાડ્યો કે ઘણી જગ્યાએ વિપક્ષે ચૂંટણીમાં ઊભા રહેવાની હિંમત પણ ન બતાવી.
નિર્વિરોધ જીતના આંકડા રાજ્યના વિવિધ ભાગોમાંથી પ્રાપ્ત થયા છે. સૌથી વધુ બેઠકો ઉત્તર મહારાષ્ટ્ર અને પશ્ચિમ મહારાષ્ટ્રમાંથી જીતવામાં આવી છે. જેમાં ઉત્તર મહારાષ્ટ્ર: ૪૯, પશ્ચિમ મહારાષ્ટ્ર: ૪૧, કોંકણ: ૪, મરાઠવાડા: ૩, વિદર્ભ: ૩. આ આંકડાઓ સ્પષ્ટપણે દર્શાવે છે કે ઉત્તર અને પશ્ચિમ મહારાષ્ટ્રમાં ભાજપની પકડ મજબૂત બની રહી છે.
ભાજપના કહેવા મુજબ, ઉમેદવારી પાછી ખેંચવાની અંતિમ તારીખે સમય પૂરો થતાંની સાથે જ, ભાજપના ઉમેદવારો માટે નિર્વિરોધ ચૂંટાવાનો રસ્તો સરળ બન્યો.વિપક્ષ તરફથી ઘણી જગ્યાએ કાં તો કોઈ ઉમેદવાર મેદાનમાં ન આવ્યા અથવા છેલ્લી ઘડીએ ફોર્મ પાછા ખેંચી લેવામાં આવ્યા.
આ રીતે, ભાજપે ચૂંટણી લડ્યા વિના જ મોટી સંખ્યામાં જીત હાંસલ કરવાનો દાવો કર્યો છે. ભાજપ આ સફળતાને પોતાના સંગઠનની મજબૂતી અને સરકારના કામકાજની સ્વીકાર્યતા તરીકે રજૂ કરી રહી છે.
જાેકે, વિપક્ષનું માનવું છે કે ખરો મુકાબલો તો ચૂંટણીમાં હવે થવાનો બાકી છે. આમ છતાં, મતદાન શરૂ થાય તે પહેલા જ ભાજપે પ્રારંભિક સરસાઈ મેળવી લીધી છે. બાકીની બેઠકો પર યોજાનારા મુકાબલા જ હવે અંતિમ પરિણામો કોના પક્ષમાં રહેશે તે નક્કી કરશે.