સુરત, તા.૨૩
સુરત મહાનગરપાલિકા દ્વારા સ્વચ્છતાને લઈને સૌથી વધારે કામ કરવાનો આગ્રહ રાખવામાં આવી રહ્યો છે પરંતુ, હજી પણ એવા કેટલાક વિસ્તારો છે કે જ્યાં ખાનગી પ્લોટ હોય કે અન્ય મિલકતોની આસપાસ ગંદકીનું સામ્રાજ્ય જાેવા મળતું હોય છે. ગુજરાતના મુખ્યમંત્રી ગઈકાલે સુરત શહેરની મુલાકાતે આવ્યા હતા ત્યારે મુખ્યમંત્રીના રૂટ પર વર્ષોથી એક ખાડો છે તે મુખ્યમંત્રીને દેખાઈ ન જાય તે માટે પાલિકા તંત્રએ આ ખાડાને સફેદ કપડાથી કોર્ડન કરી લીધો હતો. ડભોલી બીઆરટીએસ રૂટ પર લોકોની વર્ષો જૂની સમસ્યા પાલિકા હલ કરી શકતી નથી. આ ખાડો મુખ્યમંત્રી જાેઈ જાય તો શર્મસાર સ્થિતિ સર્જાય, આ કારણોસર પાલિકાએ કપડું લગાવી ખાડો ઢાંકી દીધો હતો એવું લોકો કહી રહ્યાં છે. ગુજરાતના મુખ્યમંત્રી ભુપેન્દ્ર પટેલ રવિવારે સુરત શહેરની મુલાકાતે આવ્યા હતા. તેઓ વેડ વિસ્તારમાં એક ખાનગી કાર્યક્રમમાં હાજરી આપવા માટે જવાના હતા. મુખ્યમંત્રી એરપોર્ટથી વેડ તરફ જાય તે રૂટ પર ડભોલી બ્રિજ બાદ શ્યામ દર્શન સોસાયટી આવે છે. આ સોસાયટી અને બીઆરટીએસ રૂટ લાગુ ખાનગી માલિકીની જગ્યામાં વર્ષોથી મોટો ખાડો છે. આ ખાડામાં ચોમાસા દરમિયાન પાણી ભરાવાથી રોગચાળો ફેલાવવાનો સાથે અકસ્માત થાય તેવી ભીંતિ હોવાની ફરિયાદ વર્ષોથી થઈ રહી છે.
પાલિકા ખાનગી માલિકીની જગ્યામાં પાણીનો ભરાવો થાય તો લાખો રૂપિયાનો દંડ કરે છે પરંતુ, આ ખાડો વર્ષોથી લોકો માટે આફતરૂપ બની રહ્યો છે પરંતુ, પાલિકા તંત્ર આ ખાડો પુરવા કે જમીન પાલિકા પાસે પુરાવવા કોઈ નક્કર પગલાં ભરતી નથી. જેના કારણે આ ખાડો સ્થાનિકો માટે આફતનો ખાડો બની ગયો છે. આ ખાડા પર પાલિકા ધ્યાન આપતી નથી પરંતુ, મુખ્યમંત્રી ભુપેન્દ્ર પટેલ એરપોર્ટથી ડભોલી બ્રિજથી ડભોલી બીઆરટીએસ રૂટથી વેડ તરફ જવાના હતા. તે રૂટ પર રોડની બરાબર બાજુમાં જ મોટો ખાડો છે. પાલિકાની નિષ્ફળતાનો ખાડો મુખ્યમંત્રી જાેઈ ન જાય તે માટે પાલિકાએ ખાડો પુરવાના બદલે ખાડાની ફરતે સફેદ કાપડ બાંધીને કોર્ડન કરી દીધું હતું. આ પ્રકારની સ્થિતિ ઉભી થાય તે પહેલા જ પાલિકાએ ફરી પગલાં લઈને કામગીરી હાથ ધરવી જાેઈએ તે અનિવાર્ય છે.