સુરત,તા.૨૧
ગુજરાતના કેટલાક વિસ્તારોમાં કડકડતી ઠંડી વચ્ચે લોકોએ સ્વેટરની સાથે રેઈનકોટની પણ વ્યવસ્થા કરવી પડે એવી હવામાન વિભાગે આગાહી કરી છે. ૨૭ અને ૨૮ ડિસેમ્બરે અલગ અલગ જિલ્લાઓમાં છૂટાછવાયા વરસાદની આગાહી કરવામાં આવી છે.
હવામાન વિભાગ દ્વારા આગામી એક સપ્તાહ માટે ગુજરાતના હવામાનની આગાહી કરવામાં આવી છે. એ મુજબ આગામી પાંચ દિવસ રાજ્યમાં શુષ્ક વાતાવરણ પ્રવર્તશે, જ્યારે છઠ્ઠા અને સાતમા દિવસે રાજ્યના કેટલાક ભાગોમાં વરસાદ વરસી શકે છે.
હવામાન વિભાગની આગાહી મુજબ આગામી ૨૭ તારીખે ઉત્તર ગુજરાત અને સૌરાષ્ટ્રના કેટલાક ભાગોમાં વરસાદ વરસી શકે છે, જેમાં દ્વારકા, પોરબંદર, ભાવનગર, મોરબીનો સમાવેશ થાય છે.
જ્યારે ૨૮ ડિસેમ્બરના રોજ ઉત્તર ગુજરાતના બનાસકાંઠા, સાબરકાંઠા, અરવલ્લી અને પૂર્વ ગુજરાતના મધ્યપ્રદેશને અડીને આવેલા જિલ્લાઓ છોટાઉદેપુર, દક્ષિણ ગુજરાતમાં નર્મદા, વલસાડ દમણ અને નગર હવેલીમાં હળવો વરસાદ વરસી શકે છે.
છેલ્લા ૨૪ કલાક દરમિયાન નલિયા, પોરબંદર અને રાજકોટમાં કોલ્ડવેવ જાેવા મળી હતી, જેમાં રાજ્યમાં નલિયામાં સૌથી લઘુતમ તાપમાન ૫.૮ ડિગ્રી સેલ્સિયસ જેટલું નોંધાયું હતું, જ્યારે પોરબંદર અને રાજકોટમાં અનુક્રમે ૧૦.૫ અને ૯.૪ ડિગ્રી સેલ્સિયસ જેટલું લઘુતમ તાપમાન નોંધાયું હતું.
છેલ્લા ૨૪ કલાકમાં અમદાવાદ અને ગાંધીનગરમાં ૧૪.૪ ડિગ્રી સેલ્સિયસ જેટલું લઘુતમ તાપમાન નોંધાયું હતું. આગામી ત્રણ દિવસ સુધી તાપમાનમાં કોઈ મોટી વધઘટ જાેવા મળશે નહીં. ત્યાર બાદના દિવસોમાં રાજ્યમાં તાપમાન બેથી ત્રણ ડિગ્રી જેટલું વધશે, કારણ કે અરબસાગર ઉપરથી ભેજ ગુજરાત તરફ આવશે. ઈસ્ટરલી અને સાઉથવેસ્ટરલી પવનો ભેગા થવાથી ગુજરાતમાં હળવો વરસાદ વરસી શકે છે.