શિનજિયાંગ, તા.૧૩
ચીનની સરકારે તાજેતરમાં એક મહિલાને પોતાના તથા તેના પાડોશીના બાળકોને ઇસ્લામિક શિક્ષણ આપવા બદલ ૧૭ વર્ષની સખત કેદની સજા ફટકારી છે. ચીની અધિકારીઓના મતે, તે ગેરકાયદેસર અને ભૂગર્ભ ધાર્મિક પ્રવૃત્તિ ચલાવી રહી હતી. ચીનની સરકારે માત્ર મહિલાને જે સજા નથી આપી, પરંતુ તેની પાસે અભ્યાસ કરી રહેલા માસૂમ બાળકોને પણ જેલની સજા ફટકારી છે.
રિપોર્ટ અનુસાર, શિનજિયાંગના કોનાશેહર કાઉન્ટીની ઉઇગુર મહિલા સેલિહાન રોઝી તેના પુત્રો અને પાડોશીના પુત્રને ધાર્મિક શિક્ષણ આપી રહી હતી. આ દરમિયાન, ચીની અધિકારીઓએ તેને પકડી લીધી હતી.
હવે તેને સજા સંભળાવતાં કોર્ટે રોઝીને ૧૭ વર્ષની જેલની સજા ફટકારી છે જ્યારે રોઝીના એક દીકરાને ૧૦ વર્ષની જેલની સજા ફટકારવામાં આવી હતી, જ્યારે બીજા દીકરાને ૭ વર્ષની જેલની સજા ફટકારી છે. વઘુમાં, કોર્ટે મહિલાના પુત્રોની સાથે અભ્યાસ કરતા પાડોશી યાકુપ હિદાયતને પણ ૯ વર્ષની જેલની સજા ફટકારી છે.
એક મીડિયાના જણાવ્યા અનુસાર, રોઝીને ધાર્મિક શિક્ષણ આપવા બદલ દોષી ઠેરવવામાં આવી હતી. આ કેસ સંભાળી રહેલા પોલીસ અધિકારીના જણાવ્યા મુજબ, ચીનમાં આ રીતે ધાર્મિક શિક્ષણ આપવા સામે કડક નિયમો છે. ચીનમાં આ પ્રકારની શિક્ષણ પ્રણાલી ગેરકાયદેસર ગણાય છે. તેણે નિયમોનું ઉલ્લંઘન કર્યું છે જેથી તેમની સામે કાર્યવાહી કરાઈ છે.
તે જ સમયે, ઘણા લોકોએ આ ઘટનાની ટીકા પણ કરી છે. ટીકાકારો દલીલ કરે છે કે ભલે સરકાર આને અલગતાવાદ અને ઉગ્રવાદ સામે લડવાના પ્રયાસ તરીકે દર્શાવતી હોય, પરંતું તે સ્પષ્ટપણે ઉઇગુર મુસ્લિમોના મૂળભૂત ધાર્મિક અધિકારો પર હુમલો છે.