૮૨ આરોપીઓને કાયદાનું પાલન કરવાની ચીમકી,ગુનાહિત ઈતિહાસ ધરાવતા આરોપીઓની ઓળખ પરેડ યોજી

સુરત, તા.૧૧
આગામી જન્માષ્ટમી અને ગણેશ મહોત્સવ જેવા તહેવારોને ધ્યાનમાં રાખીને સુરત શહેર પોલીસ દ્વારા કાયદો અને વ્યવસ્થા જાળવવા માટે કડક પગલાં ભરવામાં આવી રહ્યા છે. આ જ અનુસંધાને, ભૂતકાળમાં વિવિધ ગંભીર ગુનાઓમાં ઝડપાયેલા ૮૨ જેટલા આરોપીઓની ઓળખ પરેડ યોજીને તેમને કાયદાનું પાલન કરવાની સ્પષ્ટ ચીમકી આપવામાં આવી છે.
સુરતના મહિધરપુરા વિસ્તારમાં આવેલી મોઢવણિક વાડી ખાતે ચોકબજાર, લાલગેટ અને મહિધરપુરા પોલીસ સ્ટેશનોના ૮૨ જેટલા ગુનાહિત ઈતિહાસ ધરાવતા આરોપીઓને એકત્રિત કરવામાં આવ્યા હતા. આ ઓળખ પરેડ સુરત ડીસીપી પિનાકીન પરમારની અધ્યક્ષતામાં યોજવામાં આવી હતી. આ દરમિયાન, આરોપીઓને સ્પષ્ટ શબ્દોમાં ચેતવણી આપવામાં આવી હતી કે ‘કાયદામાં રહેશો તો ફાયદામાં રહેશો.‘ એક જ સ્થળે ભેગા કરવામાં આવેલા તમામ ૮૨ આરોપીઓની પૂછપરછ કરવામાં આવી હતી. તેમના હાલના રહેઠાણ અને કામ-ધંધાના સ્થળો સહિતની વિગતો તપાસવામાં આવી હતી. ડીસીપી પિનાકીન પરમારે જણાવ્યું હતું કે, જાે કોઈપણ આરોપી ફરીથી ગુનાહિત પ્રવૃત્તિમાં સામેલ થશે, તો સુરત પોલીસ તેમની સામે કડક કાર્યવાહી કરશે.
તેમણે સ્પષ્ટપણે જણાવ્યું હતું કે શહેરમાં કાયદો અને વ્યવસ્થાની સ્થિતિને હાથમાં લેવાનો પ્રયાસ કરનારાઓને પોલીસ બિલકુલ સાંખી નહીં લે. જાેકે, પોલીસે ગુનાહિત પ્રવૃત્તિ છોડીને સારા નાગરિક બનવા ઈચ્છતા આરોપીઓ માટે હકારાત્મક વલણ પણ દાખવ્યું હતું. ડીસીપી પરમારે આવા આરોપીઓને ખાતરી આપી હતી કે જાે તેમને પોલીસની મદદની જરૂર હોય, તો પોલીસ તેમને સંપૂર્ણ સહયોગ આપવા તૈયાર છે. આનાથી ગુનાહિત જીવન છોડીને મુખ્ય ધારામાં પાછા ફરવા ઈચ્છતા લોકોને પ્રોત્સાહન મળશે. ત્રણેય પોલીસ સ્ટેશનો દ્વારા લાવવામાં આવેલા આરોપીઓમાં મારામારી, સ્નેચિંગ, હત્યાનો પ્રયાસ અને લિસ્ટેડ બુટલેગર જેવા ગંભીર ગુનાના આરોપીઓનો સમાવેશ થતો હતો. આ ઓળખ પરેડનો મુખ્ય ઉદ્દેશ્ય આગામી તહેવારો દરમિયાન કોઈ અનિચ્છનીય ઘટના ન બને તે સુનિશ્ચિત કરવાનો હતો.
ડીસીપી પિનાકીન પરમારે વધુમાં જણાવ્યું હતું કે, શહેર પોલીસ કમિશનર દ્વારા આગામી તહેવારો દરમિયાન કાયદો અને વ્યવસ્થાની જાળવણી માટે કડક સૂચનાઓ આપવામાં આવી છે. આ સૂચનાના ભાગરૂપે જ આ ઓળખ પરેડનું આયોજન કરવામાં આવ્યું હતું. જે આરોપીઓ તેમની ગુનાહિત પ્રવૃત્તિઓ ચાલુ રાખશે, તેમની સામે પોલીસ હવે વધુ કડક કાર્યવાહી કરશે. આ પ્રકારની ઓળખ પરેડ દ્વારા સુરત પોલીસે સ્પષ્ટ સંદેશ આપ્યો છે કે ગુનાહિત તત્વોને શહેરની શાંતિ અને સલામતી જાેખમમાં મૂકવા દેવામાં આવશે નહીં, અને કાયદાનું ઉલ્લંઘન કરનારાઓ સામે કડક પગલાં ભરવામાં આવશે.