દિલ્હીમાં ૫૭.૮૫% મતદાન, છેલ્લા ૧૨ વર્ષમાં સૌથી ઓછું મતદાન

નવી દિલ્હી, તા.૦૫
દિલ્હી વિધાનસભાની ૭૦ બેઠકો માટે મતદાનનો સમય પૂર્ણ થઈ ગયો છે. આ વખતે ૫૭.૮૫% લોકોએ મતદાન કર્યું છે. ઉત્તર-પૂર્વ દિલ્હીમાં સૌથી વધુ મતદાન ટકાવારી ૬૩.૮૩% અને દક્ષિણ-પૂર્વ દિલ્હીમાં સૌથી ઓછું ૫૩.૭૭% મતદાન થયું. આ ભાજપના સાંસદ મનોજ તિવારીનો સંસદીય મતવિસ્તાર છે. છેલ્લા ૧૨ વર્ષમાં આ સૌથી ઓછું મતદાન છે.
સીલમપુરમાં નકલી મતદાનની ફરિયાદ પર હોબાળો થયો હતો. ભાજપે આરોપ લગાવ્યો છે કે સીલમપુરમાં બુરખા પહેરેલી મહિલાઓ દ્વારા નકલી મતદાન કરવામાં આવી રહ્યું છે. આ દરમિયાન આપ અને ભાજપ સમર્થકો એકબીજા સાથે અથડાયા, જેના કારણે અરાજકતા ફેલાઈ ગઈ. બૂથ લેવલ ઓફિસરએ સ્વીકાર્યું કે અન્ય લોકોએ બીજા કોઈના નામે મતદાન કર્યું હતું. જાેકે, દિલ્હી પોલીસે તેની તપાસમાં કહ્યું હતું કે સમાન નામોને કારણે મૂંઝવણ થઈ હતી. આ પછી પોલીસ અહીં તપાસ કરી રહી છે. આપ સાંસદ સંજય સિંહે જણાવ્યું હતું કે, નોર્થ એવન્યુ એન બ્લોકમાં ૨૦૦૦-૩૦૦૦ રૂપિયાનું વિતરણ કરવામાં આવ્યું હતું અને લોકોની આંગળીઓ પર શાહી લગાવવામાં આવી હતી. આ બધું ચૂંટણી પંચના નાક નીચે થઈ રહ્યું છે.
મતદાન દરમિયાન ફ્લાઈંગ કિસ આપવાના આરોપમાં આપના ૨ ધારાસભ્યો વિરુદ્ધ એફઆઇઆર દાખલ કરવામાં આવી છે. દિનેશ મોહનિયા વિરુદ્ધ ફ્લાઈંગ કિસ આપવા બદલ એક મહિલાએ કેસ દાખલ કર્યો. ઓખલાના ધારાસભ્ય અમાનતુલ્લાહ ખાન વિરુદ્ધ આચારસંહિતા ભંગનો કેસ નોંધવામાં આવ્યો છે.
આર્યન પબ્લિક સ્કૂલ મતદાન મથક પર બોગસ મતદાનના આરોપો બાદ, સીલમપુર બ્લોક લેવલ ઓફિસર સબીના સાદિકે જણાવ્યું હતું કે, “મતદાન કરવા આવેલી એક મહિલા મતદારને કહેવામાં આવ્યું હતું કે તેનો મત પહેલેથી જ આપી દેવામાં આવ્યો છે. તે સમયે મતદાન બંધ કરી દેવામાં આવ્યું હતું.” આ દરમિયાન દિલ્હી પોલીસનું કહેવું છે કે, “ઉસ્માનપુરની એક મહિલાએ ફોન કરીને કહ્યું હતું કે તેનો મત પહેલાથી જ કોઈ બીજા દ્વારા આપવામાં આવ્યો છે. તપાસમાં જાણવા મળ્યું છે કે આ મૂંઝવણ એ જ નામની બીજી મહિલાને કારણે હતી. તે મહિલા પહેલા તે જ સરનામે ભાડૂઆત હતી. ચકાસણી પછી, પ્રિસાઇડિંગ ઓફિસરે બંને મહિલાઓને મતદાન કરવાની મંજૂરી આપી છે.”
દિલ્હીના કસ્તુરબા નગર વિધાનસભા ક્ષેત્રના એન્ડ્રૂઝ ગંજ વિસ્તારમાં આવેલા સર્વોદય વિદ્યાલયમાં બે લોકો નકલી મતદાન કરવા જઈ રહ્યા હતા. તે પહેલાં જ તેને દિલ્હી પોલીસે પકડી લીધો હતો. કસ્તુરબા નગરમાં આપ, ભાજપ અને કોંગ્રેસ વચ્ચે ત્રિકોણીય મુકાબલો છે. આ બેઠક પરથી કોંગ્રેસે અભિષેક દત્ત, ભાજપે નીરજ બસોયા અને આપએ રમેશ પહેલવાનને મેદાનમાં ઉતાર્યા છે.