મનપા ઊંઘમાં, રિક્ષા ખાડામાં !! પાલિકાકર્મી ડ્રેનેજ કામગીરી માટે ખાડો ખોદી બેરિકેટ મૂકતા ભૂલ્યા કોર્પોરેશનની બેદરકારીએ ચાલકનો જીવ અધ્ધર ચડાવ્યો

સુરત, તા.૦૫
સુરતના વેડ રોડ વિસ્તારમાં ગઈકાલે રાતે ડ્રેનેજ કામગીરી માટે ખોદેલા ખાડામાં એકાએક રિક્ષાચાલક ખાબક્યો. પાલિકાકર્મીઓ બેરિકેટ લગાવ્યા વગર જ ખાડો ખુલ્લો મૂકીને જતા રહેતા અકસ્માત સર્જાયો હતો. કોર્પોરેશનની આ બેદરકારીથી ચાલકનો જીવ પણ અધ્ધર ચડી ગયો હતો. જાેકે, રિક્ષામાં કોઈ પેસેન્જર ન હોવાના કારણે જાનહાનિ સર્જાઈ નથી. આ સમગ્ર ઘટના સીસીટીવીમાં કેદ થઈ છે. મળતી માહિતી મુજબ સુરતના વેડ રોડ વિસ્તારમાં ખાડો ખોદીને કોર્પોરેશન દ્વારા કામગીરી હાથ ધરવામાં આવી હતી.
જાેકે, સાંજના આ કામગીરી પૂર્ણ થયા બાદ પાલિકાકર્મીઓ આ ખાડાની આસપાસ બેરિકેડ લગાવ્યા વગર જ નીકળી ગયા હતા. થોડા સમય બાદ તે રસ્તે જ પૂરપાટ ઝડપે એક રિક્ષા નીકળી. જાેકે, ખાડાની આસપાસ બેરિકેડ ન હોવાના કારણે રિક્ષાચાલક તે રસ્તે જ આગળ ગયો ને ખાડામાં ખાબક્યો. સદ્દનસીબે આ અકસ્માત સમયે રિક્ષામાં કોઈ જ પેસેન્જર નહોતું. આ અકસ્માતમાં રિક્ષાચાલક સામાન્ય ઈજાગ્રસ્ત થયો હતો. જાેકે, આ ઘટનાથી મનપાની બેદરકારી સામે આવી છે.